மும்பை: சமந்தா, வருண் தவான் நடிப்பில் வெளியான ‘சிட்டாடெல்: ஹனி பனி’ தொடரின் அடுத்த சீசன் ரத்து செய்யப்படுவதாக அமேசான் நிறுவனம் அறிவித்துள்ளது.
கடந்த 2022-ம் ஆண்டு ரிச்சர்ட், பிரியங்கா சோப்ரா நடிப்பில் அமேசான் ப்ரைம் வீடியோ ஓடிடி தளத்தில் வெளியான இணையத் தொடர் ‘சிட்டாடெல்’. இது நல்ல வரவேற்பை பெற்றது. இந்தத் தொடரின் இந்திய பதிப்புக்கு ‘சிட்டாடெல்: ஹனி பனி’ என தலைப்பிடப்பட்டது. ‘தி ஃபேமிலி மேன்’, ‘ஃபார்ஸி’ தொடர்களை இயக்கிய ராஜ் மற்றும் டிகே இந்த தொடரை இயக்கினர். வருண் தவான், சமந்தா ஆகியோர் பிரதான கதாபாத்திரங்களில் நடித்தனர்.
ஆனால், இத்தொடர் எதிர்பார்த்த வரவேற்பை பெறவில்லை. இந்த நிலையில், இத்தொடரின் அடுத்த சீசன் ரத்து செய்யப்படுவதாக அமேசான் எம்ஜிஎம் ஸ்டூடியோஸ் தலைவர் வெர்னான் சாண்டர்ஸ் அறிவித்துள்ளார். மேலும், பிரியங்கா சோப்ரா நடிப்பில் வெளியான ஒரிஜினல் தொடரான ‘சிட்டாடெல்’ மட்டும் அடுத்த சீசனுக்கு தயாராகும் என்று தெரிவித்துள்ளார். இதன் புதிய சீசன் 2026ஆம் ஆண்டு வெளியாக உள்ளது.
அதே போல ‘சிட்டாடெல்’ தொடரின் இத்தாலிய பதிப்பான ‘டயானா’ தொடரும் ரத்து செய்யப்பட்டுள்ளது. இதற்கான காரணம் குறித்து அமேசான் நிறுவனம் வெளிப்படையாக தெரிவிக்காவிட்டாலும், இந்த இரண்டு தொடர்களும் போதுமான வியூவர்ஷிப்-ஐ பெறவில்லை என்பதே இதற்கு காரணம் என்று கூறப்படுகிறது.
