ஆஷஸ் 2-ஆவது டெஸ்ட் போட்டியில் இங்கிலாந்து அணி முதல் நாள் ஆட்ட நேர முடிவில் 9 விக்கெட்டுகள் விட்டுகொடுத்து 325 ரன்கள் எடுத்துள்ளது.

ஆஸ்திரேலியாவில் சுற்றுப்பயணம் மேற்கொண்டுள்ள இங்கிலாந்து கிரிக்கெட் அணி 5 போட்டிகள் கொண்ட ஆஷஸ் டெஸ்ட் தொடரில் பங்கேற்றுள்ளது. இதில் பெர்த்தில் நடந்த முதலாவது டெஸ்டில் ஆஸ்திரேலியா 8 விக்கெட் வித்தியாசத்தில் வெற்றி பெற்று தொடரில் 1-0 என்ற கணக்கில் முன்னிலை வகிக்கிறது.

இதனையடுத்து ஆஸ்திரேலியா- இங்கிலாந்து இடையிலான 2-ஆவது டெஸ்ட் போட்டி பிரிஸ்பேனில் உள்ள கப்பா மைதானத்தில் இன்று (டிச.04) பகல்-இரவு போட்டியாக தொடங்கியது.

இதில் முதலில் டாஸ் வென்று பேட்டிங் செய்த இங்கிலாந்து அணி தொடக்கம் முதலே தடுமாறியது. இந்த போட்டியில் ஸ்டார்க் வீசிய முதல் ஓவரின் கடைசி பந்தில் பென் டக்கெட் ”கோல்டன் டக்” ஆகி வெளியேறினார். அடுத்து வந்த ஆலி போப்பையும் ஸ்டார்க் டக் அவுட்டில் வெளியேற்றினார்.

முதல் இன்னிங்சில் 5 ரன்களுக்குள் 2 விக்கெட்டுகளை இழந்து தடுமாறிய இங்கிலாந்து அணியை ஜோ ரூட் – ஜாக் கிராலி ஜோடி சிறப்பாக விளையாடி சரிவிலிருந்து மீட்டனர். 3-ஆவது விக்கெட்டுக்கு 117 ரன்கள் பார்ட்னர்ஷிப் அமைத்து அசத்திய இந்த ஜோடியை மைக்கேல் நெசர் பிரித்தார். அவரது பந்துவீச்சில் கிராலி 76 ரன்களில் ஆட்டமிழந்தார்.

அடுத்து வந்த ஹாரி புரூக் 31 ரன்களிலும், கேப்டன் பென் ஸ்டோக்ஸ் 19 ரன்களிலும் ஆட்டமிழந்தனர். ஒருபுறம் விக்கெட் சரிந்தாலும் மறுமுனையில் ஜோ ரூட் விக்கெட் கொடுக்காமல் விளையாடினார். ஆஸ்திரேலிய பந்துவீச்சை திறம்பட சமாளித்த அவர் சதமடித்து அசத்தினார். ஆஸ்திரேலிய மண்ணில் அவரது முதல் டெஸ்ட் சதமாக இது பதிவானது.

பின்வரிசை வீரர்களில், வில் ஜாக்ஸ் 19, கஸ் அட்கின்சன் 4, பிரைடன் கார்ஸ் 0 ரன்களில் தொடர்ந்து ஆட்டமிழந்து ஏமாற்றினர். ஜோ ரூட் 135(202) ரன்களும், ஆர்ச்சர் 32(26) ரன்கள் அடித்து களத்தில் உள்ளனர். இதன் மூலம் முதல் நாளில் இங்கிலாந்து அணி 9 விக்கெட்டுகள் இழப்புக்கு 325 ரன்கள் எடுத்துள்ளது. ரூட் ஆர்ச்சர் ஜோடி 44 பந்துகளில் 61 ரன்கள் பார்ட்னர்ஷிப் அமைத்துள்ளது குறிப்பிடத்தக்கது. ஆஸ்திரேலியா தரப்பில் மிட்செல் ஸ்டார்க் 6 விக்கெட்டுகள் வீழ்த்தியுள்ளார். நாளை (டிச.05) 2-ஆவது நாள் ஆட்டம் நடைபெற உள்ளது.

வாசிம் அக்ரம் ரெக்கார்டை உடைத்து மிட்செல் ஸ்டார்க் சாதனை

ஆஸ்திரேலிய அணியின் நட்சத்திர வேகப்பந்து வீச்சாளர் மிட்செல் ஸ்டார்க், டெஸ்ட் கிரிக்கெட் வரலாற்றில் பாகிஸ்தான் பந்துவீச்சாளர் வாசிம் அக்ரம் படைத்திருந்த ‘அதிக விக்கெட் வீழ்த்திய இடதுகை வேகப்பந்து வீச்சாளர்’ என்ற சாதனையை முறியடித்து புதிய உலக சாதனையை படைத்துள்ளார்.

அதன்படி, இந்த போட்டியில் முதல் ஓவரை வீசிய மிட்செல் ஸ்டார்க், கடைசி பந்தில் பென் டக்கெட்டை ‘கோல்டன் டக்’ முறையில் வெளியேற்றினார். சிறிது நேரத்தில் ஆலி போப்பையும் டக் அவுட் ஆக்கினார். இந்த இரண்டு விக்கெட்டுகள் மூலம், வாசிம் அக்ரமின் 414 விக்கெட்டுகள் என்ற சாதனையை ஸ்டார்க் சமன் செய்தார்.

இதையடுத்து, மிட்செல் ஸ்டார்க் வீசிய பந்தில் இங்கிலாந்து வீரர் ஹாரி ப்ரூக் கொடுத்த கேட்சை ஸ்லிப்பில் நின்ற ஸ்டீவ் ஸ்மித் பிடித்தார். இது மிட்செல் ஸ்டார்க்கின் 415-ஆவது டெஸ்ட் விக்கெட் ஆகும். இதன் மூலம் வாசிம் அக்ரமை பின்னுக்குத் தள்ளி, டெஸ்ட் வரலாற்றில் அதிக விக்கெட் வீழ்த்திய இடதுகை வேகப்பந்து வீச்சாளர் என்ற பெருமையை ஸ்டார்க் பெற்றார்.

அதிக டெஸ்ட் விக்கெட் வீழ்த்திய இடதுகை வேகப்பந்து வீச்சாளர்கள் பட்டியலில், மிட்செல் ஸ்டார்க் (ஆஸ்திரேலியா) – 415 விக்கெட்டுகள் எடுத்து முதலிடத்திலும், வாசிம் அக்ரம் (பாகிஸ்தான்) – 414 விக்கெட்டுகள், சமிந்தா வாஸ் (இலங்கை) – 355 விக்கெட்டுகள், டிரென்ட் போல்ட் (நியூசிலாந்து) – 317 விக்கெட்டுகள், மிட்செல் ஜான்சன் (ஆஸ்திரேலியா) – 313 விக்கெட்டுகள், ஜாகீர் கான் (இந்தியா) – 311 விக்கெட்டுகள் என அடுத்தடுத்த இடத்தில் உள்ளனர்.