இந்திய அணியில் டாப் 6 பேட்டர்களில் ஒரே இடது கை வீரராக ரிஷப் பந்த் மட்டுமே இருந்தார். ஆனால் அவரும் காயம் காரணமாக இல்லாததால் இந்திய அணியில் இடது கை பேட்டர்களுக்குப் பஞ்சம் ஏற்பட்டுள்ளது. ரிஷப் பந்த் அளவுக்கு இஷான் கிஷனின் பேட்டிங்கில் நம்பகத்தன்மை இல்லை. அவர் வங்கதேசத்திற்கு எதிராக அதிவேக அதிரடி இரட்டைச் சதம் விளாசியது அவர் மீது நம்பிக்கை ஏற்படுத்தினாலும் சீரான முறையில் அவர் ஆடுவதில்லை. இப்போது ரிங்கு சிங் பெயர் அடிப்பட்டுக் கொண்டிருக்கிறது.
அணிக்கு இடது கை பேட்டர்கள் தேவை என்பதில் மாற்றுக் கருத்துக்கள் இல்லை. 2011 உலகக்கோப்பையில் கவுதம் கம்பீர், யுவராஜ் சிங், சுரேஷ் ரெய்னா என்று அணியில் லெஃப்ட் ஹேண்டர்கள் இருந்தனர். ஆகவே இடது கை வீரர்கள் அணியில் இருப்பது எதிரணியினருக்கு பெரிய சவால் என்பதில் மாற்று கருத்துகள் இல்லை. அதனால்தான் ரவி சாஸ்திரி மிகச்சரியாகவே இரண்டு இடது கை பேட்டர்கள் தேவை என்கிறார்.
இது தொடர்பாக ரவி சாஸ்திரி கூறியது:
“அணியில் சரியான வீரர்களின் சேர்க்கை அவசியம். அணிக்கு இடது கை பேட்டர்கள் தேவை. தொடக்க நிலையில் இல்லாவிட்டாலும் 3 அல்லது 4ம் நிலையில் இடது கை பேட்டர்கள் இந்த உலகக்கோப்பைக்குத் தேவை. இத்தகைய விருப்பத் தெரிவுகளை எப்போதும் பரிசீலனையில் வைத்திருக்க வேண்டும். குறிப்பாக டாப் 6 பேட்டர்களில் 2 இடது கை வீரர்கள் இந்திய அணிக்கு அவசியம் என்று கருதுகிறேன்.
1999-2003-ல் ஆஸ்திரேலியாவிடம் கில்கிறிஸ்ட், ஹெய்டன் போன்றோர் இருந்தனர். ஹாட்ரிக் உலகக் கோப்பைகளை ஆஸ்திரேலியா தட்டிச் செல்லும் போது இடது கை பேட்டர்களின் ஆதிக்கம் அதிகம் இருந்தது. இந்திய அணியில் இப்போது போதுமான இடது கை பேட்டர்கள் இருக்கின்றனர். இஷான் கிஷன், திலக் வர்மா, ஜெய்ஸ்வால் ஆகியோர் எந்த ஒரு சீனியர் வீரரையும் ரீப்ளேஸ் செய்ய முடியும்.
