இந்திய விமானி ஸ்மித் மச்சாருக்கு இஸ்ரேல் அரசின் வீரதீர விருது அறிவிக்கப்பட்டுள்ளது.

விமானக் கடத்தல் முயற்சியைத் தடுத்து பயணிகளின் உயிரைக் காப்பாற்றிய இந்திய விமானி ஸ்மித் மச்சாருக்கு உலகம் முழுவதும் இருந்து பாராட்டுகள் குவிந்து வருகின்றன. இந்நிலையில், இஸ்ரேல் அரசின் வீரதீரச் செயலுக்கான விருது ஸ்மித் மச்சாருக்கு வழங்கப்படும் என்று இஸ்ரேல் அதிபர் ஐசக் ஹெர்சாக் அறிவித்துள்ளார்.

கடந்த மாதம் 30-ஆம் தேதி, துபாயில் இருந்து இஸ்ரேலின் டெல் அவிவ் நகருக்கு 172 பயணிகள் மற்றும் விமானப் பணிக்குழுவினருடன் சென்ற ஃப்ளைதுபாய் நிறுவன விமானத்தைக் கடத்த முயற்சி நடந்ததாகக் கூறப்படுகிறது. ஓமன் நாட்டைச் சேர்ந்த துணை விமானி ஹமாம் அல்-ஹம்மாமி, விமானத்தின் தலைமை விமானி ஸ்மித் மச்சாரைத் தாக்கியதாகத் தெரிவிக்கப்பட்டுள்ளது.

பலத்த காயமடைந்து உயிருக்கு ஆபத்தான நிலையில் இருந்தபோதிலும், ஸ்மித் மச்சார் மன உறுதியுடன் போராடி, சக பயணிகளின் உதவியுடன் துணை விமானியைக் கட்டுப்படுத்தி, விமானத்தைப் பாதுகாப்பாகத் தரையிறக்க உதவினார். இதன் மூலம் பயணிகளின் உயிரைக் காப்பாற்றிய அவருக்குப் பல்வேறு தரப்பினரும் பாராட்டுகளைத் தெரிவித்து வருகின்றனர்.

இந்நிலையில், ஃப்ளைதுபாய் விமானத்தையும் அதில் பயணித்தவர்களையும் காப்பாற்ற உதவிய 6 பேருக்கு, டெல் அவிவ் நகரில் உள்ள அதிபர் மாளிகையில் நேற்று நடைபெற்ற விழாவில் விருதுகள் வழங்கப்பட்டன. அப்போது பேசிய இஸ்ரேல் அதிபர் ஐசக் ஹெர்சாக், “கேப்டன் ஸ்மித் மச்சாரின் துணிச்சலும் தொழில்முறைத் திறமையும் மிகப்பெரிய பேரழிவைத் தடுத்துள்ளன.

இஸ்ரேலின் உயரிய வீரதீரச் செயலுக்கான விருது விரைவில் அவருக்கு வழங்கப்படும். அவர் விரைந்து குணமடைய வாழ்த்துகிறேன். அவர் குணமடைந்து வீடு திரும்பியதும் விருது வழங்கப்படும்” என்று தெரிவித்தார்.