டெல்லி பல்கலைக்கழக மாணவர் சங்கத் (DUSU) தேர்தலில் காங்கிரஸ் கட்சியின் மாணவர் அமைப்பான தேசிய மாணவர் சங்கம் ஒரு பதவியைக்கூட கைப்பற்றத் தவறிய நிலையில், அந்த அமைப்பைச் சேர்ந்த உறுப்பினர் ஒருவர் கன்னையா குமார் தலைமையிலான செயல்பாடுகள் குறித்து காங்கிரஸ் மூத்த தலைவர்கள் ராகுல் காந்தி மற்றும் பிரியங்கா காந்தி வத்ராவிடம் புகார் அளித்துள்ளார்.

வேட்பாளர் தேர்வு, தேர்தலில் போட்டியிட விரும்பியவர்களை கையாண்ட விதம், வளாகத் தேர்தல்களில் அமைப்பின் தலைமை போதிய அளவில் ஈடுபடாதது உள்ளிட்ட பல்வேறு குற்றச்சாட்டுகள் புகாரில் தெரிவிக்கப்பட்டுள்ளதாக கூறப்படுகிறது. தேசிய மாணவர் சங்கம்-ன் அகில இந்திய காங்கிரஸ் கமிட்டி பொறுப்பாளராக உள்ள கன்னையா குமார், களத்தில் போதிய அளவில் ஈடுபடவில்லை என்றும், மாணவர் தலைவர்களிடம் ஆலோசிக்காமல் முடிவுகளை எடுத்ததாகவும் அந்த உறுப்பினர் குற்றம்சாட்டியுள்ளார்.

குறிப்பாக, தேசிய மாணவர் சங்கம்-யில் இருந்து விலகி சுயேச்சையாகப் போட்டியிட்டு DUSU துணைத் தலைவர் பதவியை வென்ற தீபான்ஷு ஷோகீன் விவகாரம் முக்கியமாக சுட்டிக்காட்டப்பட்டுள்ளது. ‘காலணி அணியாத வேட்பாளர்’ என அறியப்பட்ட ஷோகீன், தேசிய மாணவர் சங்கம் சார்பில் போட்டியிட வாய்ப்பு கிடைக்காததால் சுயேச்சையாக களமிறங்கினார். அவர் 30,615 வாக்குகள் பெற்று துணைத் தலைவர் பதவியை வென்றார். தேசிய மாணவர் சங்கம்-ன் அதிகாரப்பூர்வ வேட்பாளர் வீர் சத்ரத் 4,313 வாக்குகள் மட்டுமே பெற்று 3-வது இடத்துக்கு தள்ளப்பட்டார்.

ஷோகீன் முதலில் தேசிய மாணவர் சங்கம் சார்பில் போட்டியிட விரும்பியதாகவும், ஆனால் அவர் எந்தப் பதவியில் போட்டியிட வேண்டும் என்பதில் ஏற்பட்ட கருத்து வேறுபாட்டைத் தொடர்ந்து சுயேச்சையாகப் போட்டியிட்டதாகவும் அமைப்பைச் சேர்ந்த சிலர் தெரிவித்துள்ளனர். அவரை தக்கவைத்துக்கொள்ள அல்லது அவருடன் பேச்சுவார்த்தை நடத்த அமைப்பின் சார்பில் போதிய முயற்சி மேற்கொள்ளப்படவில்லை என்றும் குற்றச்சாட்டு முன்வைக்கப்பட்டுள்ளது.

இதுபோல், தேசிய மாணவர் சங்கம் சார்பில் போட்டியிட விரும்பிய மற்றொரு மாணவர் விஷேஷ் யாதவும், டிக்கெட் விவகாரத்தில் ஏற்பட்ட கருத்து வேறுபாட்டுக்குப் பிறகு அமைப்புக்கு வெளியே இருந்து இணைச் செயலாளர் பதவிக்கு போட்டியிட்டார். அவர் 15,778 வாக்குகள் பெற்ற நிலையில், தேசிய மாணவர் சங்கம்-ன் அதிகாரப்பூர்வ வேட்பாளர் கோபால் சவுத்ரி 15,206 வாக்குகள் பெற்றார்.

DUSU தேர்தலில் தேசிய மாணவர் சங்கம்-ன் செயல்பாடு தொடர்ந்து சரிவைச் சந்தித்துள்ளதாகவும் அந்த அமைப்பைச் சேர்ந்த உறுப்பினர்கள் தெரிவித்துள்ளனர். 2023-ல் ஒரு பதவியை வென்ற தேசிய மாணவர் சங்கம், 2024-ல் 2 பதவிகளையும், 2025-ல் ஒரு பதவியையும் கைப்பற்றியது. 2026-ம் ஆண்டில் மத்திய குழுவின் 4 பதவிகளிலும் வெற்றி பெற முடியவில்லை. 2015-ம் ஆண்டுக்குப் பிறகு முதல் முறையாக DUSU மத்திய குழுவில் தேசிய மாணவர் சங்கம் எந்தப் பதவியையும் பெறவில்லை.

தேசிய மாணவர் சங்கம் தலைமை, களப்பணியை விட சமூக வலைதளங்கள் மற்றும் ‘எக்ஸ்’ தளத்தில் அமைப்பின் தோற்றத்துக்கு அதிக முக்கியத்துவம் அளிப்பதாகவும், வேட்பாளர்களுக்கு டிக்கெட் வழங்கப்பட்ட பிறகு தேர்தல் களத்தில் தலைமை நிர்வாகிகள் போதிய அளவில் ஈடுபடவில்லை என்றும் சில உறுப்பினர்கள் புகார் தெரிவித்துள்ளனர்.

மேலும், தேசிய மாணவர் சங்கம்-ன் தேசிய அமைப்பு சார்ந்த குழுக்கள் அமைக்கப்படாமல் இருப்பதாகவும், கல்லூரி அளவிலான மாணவர் தலைவர்களுடன் கன்னையா குமார் தொடர்ந்து தொடர்பில் இருக்கவில்லை என்றும் அமைப்பைச் சேர்ந்த சிலர் குற்றம்சாட்டியுள்ளனர்.

“தேசிய மாணவர் சங்கம் பொறுப்பாளராக இருக்கும் கன்னையா குமார் கல்லூரி அளவிலான தலைவர்களுடன் தொடர்ந்து தொடர்பில் இருந்திருக்க வேண்டும். அவர்களுடன் ஆலோசித்து செயல்பட்டிருந்தால், கள நிலவரத்தை அவருக்கு எடுத்துச் சொல்லியிருக்க முடியும். ஆனால், அவர் எங்களுடன் தொடர்புகொள்ளவில்லை” என்று டெல்லி பல்கலைக்கழக கல்லூரியின் முன்னாள் மாணவர் தலைவர் ஒருவர் தெரிவித்துள்ளார்.

இதனிடையே, “எங்கள் அமைப்பு மற்றும் அதன் தலைமையை தீவிரமாக மறுபரிசீலனை செய்ய வேண்டிய நேரம் இது” என்று தேசிய மாணவர் சங்கம் உறுப்பினர் ஒருவர் ‘எக்ஸ்’ தளத்தில் பதிவிட்டிருந்தார். பின்னர் அந்தப் பதிவு நீக்கப்பட்டது.